كتاب التاريخ .. قصيدة لزهرة يونس
كتاب
كتاب تاريخ
زي استكانة شاي
ساعة عصاري
ف وسط لمة عيلة
حكاويها .. دفا
زي ريحة المطرة 
فوق الزرع
وقت الفجر..
جو.. ماليه الصفا
زي لمعة عين بنية (بنت)
بالضفاير والفيونكة
لسة داخلة المدرسة.
حلمها تكبر وتعلى
تكون.. نمرها كويسة
زي فرحة طفل..لسة
 في البداية..
 واحدة واحدة
بيخطي العتب
زي دقة قلبي
 لما..أسمعه 
أو حتى أصادف طلته
والعيون اللي بلقاها
فجأة.. بيروح التعب
هي دي صورتك
 .. ف بالي
 لو سرح عنك خيالي
بكرة راجع لك.. ياأمي
أيوة انا مفارق .. وراضي
لأجل أجيب لقمة.. ولادي
ماانتي ياأما..
 ساعات بتنسي
من زمان.. قدرتي تقسي
ع الوليد اللي هواكي
ايوة ياأما.. 
انا خدت ورثي
م الجدود.. 
في كتاب تاريخ
لاانتي عارفة تكمليه
ولا بالرخص تبيعيه
ولا حتى تسيبي لابنك
فرصة… 
يقرا في التاريخ 
 
 
 
 
 
بواسطة belaad بتاريخ 9 يناير, 2018 في 03:05 مساءً | مصنفة في ثقافة و أدب | لا تعليقات

اترك تعليقا